Hainbat erasotan parte hartzea leporatuta, Frantziako Poliziak 11 gazte atxilotu zituen Korsikan. Horietatik hamar Parisera eraman zituzten ostegunean. Bastiako aireportuan hegazkinera igotzeko zain zeudenean, ordea, haiekin zegoen polizietako batek airekoaren aurrean jarrarazi zuen taldea, eta argazkiak atera zizkion. Gertatutakoaren bideoa sareetan zabaldu du Aiutu Paisanu erakundeak, salatuz «garaikur» bat balira bezala tratatu zituztela gazteak.
Vidéo du transfert des 10 jeunes corses à #Paris : Les policiers de la #SDAT, cagoulés, prennent la pose devant leur "trophée"...#BastaARipressione#Libertàpic.twitter.com/VAWDaXy5Up
— Aiutu Paisanu (@aiutupaisanu) December 12, 2019
Erakundea ez da gertatu dena gaitzetsi duen bakarra. Korsikako Asanblea Nazionaleko diputatu Michel Castellanik ere salatu du «tratu umiliagarria» eman dietela gazteei. Hark eta beste bi diputatuk, Jean Felix Acquavivak eta Paul Andre Colombanik, Fiskaltzara jo dute Poliziaren jarrera salatzeko. «Gizakiarekiko errespetua eta errugabetasun printzipioa urratzen ditu segurtasun indarren jarrerak», salatu dute hiru diputatuek Fiskaltzari helarazitako oharrean.
