FARC gerrillak azaroaren 16an bahitu zuen Ruben Dario Alzate Kolonbiako armadako jenerala, beste bi lagunekin batera. Juan Manuel Santos Kolonbiako presidenteak atzo iragarri zuen FARCek larunbatean utziko dituela aske; gaur, ordea, gerrillaren bake negoziazioetarako ordezkaritzak esan du igandean izango dela: "Ziurtatu dezakegu Alzate jeneralak, Rodriguez buruak eta Urrego doktoreak igandean besarkatu ahal izango dituztela haien gertukoak, meteorologiak hala baimentzen badu", adierazi dute ohar baten bitartez.
FARCek bahitutako graduazio goreneko militarra da Alzate, eta Kolonbiako Gobernuak behin-behinean bertan behera utzi zituen bake negoziazioak. Chocoko oihan sailean zebilen, bi laguntzailerekin, zibilez jantzita eta eskoltarik gabe.
