Gutxienez FARC Indar Armatu Iraultzaile Kolonbiarretako 33 kide hil dituzte Kolonbiako armadaren operazio batean, Arauca eskualdean, Juan Manuel Santos Kolonbiako presidenteak baieztatu duenez. Beste kide bat atzeman dute.
Santosek Twitter bidez jakinarazi du FARCen aurkako "kolpe handia" izan dela, eta Kolonbiako armadako kideak zoriondu ditu.
Lehenik airez bonbardatu dituztela jakinarazi du armadako buru batek, eta ondoren talde mugikor baten bidez jardun dutela.
Gaur hildakoekin 36 dira azken 24 orduetan hil diren FARCeko kideak, eta guztira bost kide atxilotu dituzte.
