Floridako Parklandeko institutu batean (Marjory Stoneman Douglas High School) gertatu da tiroketa, AEBetan. Abisua jaso dutenean, poliziak campusera joan dira, eta itxi egin dute ingurua. Ehunka ikasle eta irakasle ebakuatu dituzte. Ustez tiroka aritu den gizonezkoa atxilotua dago ordu honetan.
Polizien buruak kazetariei jakinarazi du atxilotutako gizonak 18 urte dituela, eta gaur egun ez zela eskola horretan ikasten ari, baina garai batean bai izan zela bertako ikaslea. "Katastrofe bat izan da, ez dago hitzik", esan du Scott Israel polizien buruak.
Poliziaren bulegoak jakinarazi du "gutxienez hamalau biktima" izan direla tiroketa horretan, ospitaleetara eraman dituztenak zenbatuta. Baina ez dute argitu horien egoera zein den, eta horietatik zenbat hil diren.
Hezkuntza ikuskaritzak berretsi du hildakoak badirela biktimen artean. Eta erantsi du pertsona bakarra izan dela, itxuraz, tiroketa egin duena. Ez dute beste daturik oraingoz.
Urtea hasi denetik pasatu diren zazpi aste eskasetan, hildakoak utzi dituzten zortzi tiroketa gutxienez gertatu dira AEBetan.
