La Serena espetxeko presoen sarrera-irteerak jasotzen dituen liburu bat aurkitu ostean hartu du Mario Carroza epaileak Txileko Heriotzaren Karabanaren auzia berriz irekitzeko erabakia. Izan ere, dokumentuan jasotzen da nola 1973ko urriaren 13an —Augusto Pinocheten estatu kolpetik hilabete baino gehiagora— dozenaka preso atera zituzten La Serenako kartzelatik, Coquimboko erregimentura eramateko. Hain zuzen, epailea ikertzen ari da erregimendu hark eta bertako komandanteak, Juan Emilio Cheyrek, eskuadroiaren hilketetan izan zuten esku hartzea.
Heriotzaren Karabana deritzonak Txile osotik bidaiatu zuen, eta oposizioko dozenaka kide hil zituen, 1973ko irailaren 11ko estatu kolpearen ostean. Eskuadroiak helikopteroz bidaiatzen zuen herrialdeko espetxeetara, eta, hara iritsitakoan, aukeratutako presoak atera eta ezkutuan fusilatzen zituen. Sergio Arellano Stark jenerala zen taldeko burua, eta baita Pinocheten ordezkari zuzena ere.
