Baltasar Garzon epaileak Gurtel auziaren instrukzioa dela-eta Espainiako Auzitegi Gorenak jarritako zigorrari helegitea jarri dio gaur Auzitegi Konstituzionalean. Auzitegi Gorenak 11 urtean epaile izateko gaitasunik gabe utzi zuen Garzon pasa den otsailean. Gurtel auziko ustelkeria sarea ikertzerakoan agindu zituen entzuketekin ikertutakoen defentsarako eskubidea urratu zuela ebatzi zuen.
Helegiteak 200 orri baino gehiago ditu, eta horretan biltzen da Auzitegi Gorenaren erabakia "larriki konstituzioaren aurkakoa" dela, Espainiako legedian "existitzen ez den" delitu batengatik epaitu dutela uste baitute.
Auzitegi Gorenaren arabera, Garzonek "drastikoki eta justifikaziorik gabe" murriztu zuen defentsarako eskubidea, Francisco Correak eta Pablo Crespok beren abokatuekin izan zituzten elkarrizketak grabatzeko agindu zuelako. "Erregimen totalitarioetako praktikak" erabili izana leporatu zion Justiziak.
