Shinzo Abe Japoniako lehen ministroa gaur joan da bisitan Yasukuni tenplura, Tokion. Besteak beste, Bigarren Mundu Gerran hildako soldaduen omenez eraiki zuten tenplua, eta leku hura gatazka gaia izan ohi da Japoniaren eta inguruko herrialdeen artean. Gaurko bisitak hautsak harrotu ditu berriro ere.
Txinako Gobernuak iragarri du kexa formala aurkeztuko duela bisitaren harira. Abe tenplura joan izana gaitzetsi du Txinako Atzerri ministro Qin Gangek, eta Japoniako Gobernuari eskatu dio "gogoeta" egin dezala historian zehar eginiko "erasoez". "Akatsak zuzentzeko" neurriak har ditzala ere galdegin dio, inguruko herrialdeen eta nazioartearen konfiantza izan dezan.
Abek bisita egin izana defendatu du, eta atsekabea adierazi du lehenago ez egiteagatik. Argudiatu du "naturala" dela "nazio baten buruak euren nazioaren alde borrokatu eta hil zirenen arimen alde otoitz egitea".
Seulek ere "ondorio diplomatiko handiak" iragarri ditu. Hego Koreako Gobernuko goi kargudun batek Yonhap herrialdeko berri agentziari egin dizkio adierazpenok.
Ameriketako Estatu Batuek ere "etsipena" agertu dute bisitaren harira, AEBek Tokion duten enbaxadak ohar baten bidez esan duenez. AEBek uste dute inguruko herrialdeen eta Japoniaren arteko "tentsioak larriagotu" egingo dituela.
