Iragan asteazkenean Santiagon (Galizia) izandako tren istripuan “arduragabekeriaz” jokatu izana aitortu zion atzo trena gidatzen ari zen makinistak epaileari, albiste agentziek zabaldu dutenez. Legez baimendutako abiaduraren bikoitza baino azkarrago zihoala aitortu du, baita ez zuela uste "ibilbidearen puntu horretan" zegoenik, eta trena geldiarazi nahi izan zuenerako (izatez, frenoari eman ziola ere baieztatu du), "beranduegi" zela. Tren gidariaren ustez istripuan gertatutakoa "ez zen akats teknikoa izan, giza akatsa baizik".
Karguekin libre utzi du epaileak makinista; horrez gain, pasaportea erretiratu dio, eta astero aurkeztu beharko du bere burua epaitegietan. Makinista lanetan jardutea debekatu dio, halaber.
69 pertsonak jarraitzen dute ospitalean momentuan, eta horietako 22 egoera kritikoan daude.
Trenbidea, irekita
Trenak istripua izan zuen lekuko trenbidea ireki dute gaur goizean goizetik, eta istripua izan zen kurba horretan 30 kilometro orduko abiadura izan beharko dute trenek. Beste bi trenbideak irekita zeuden ostiralaz geroztik, eta horietan ere 30 kilometro orduko abiadura muga ezarria zuten orain artean, baina kendu dute dagoeneko.
Istripuaren arrazoiak argitzeko ikerketak aurrera jarraitzen du, eta bihar bertan irekiko dituzte trenaren kutxa beltzak.
