PCAS Gazako Blokeoaren Aurkako Herri Batzordeak antolatu zuen ekimena, eta 40.000 eta 50.000 lagun artean parte hartu zutela jakinarazi zuen. Historiako inoizko giza kate luzeena egin asmo zuten antolatzaileek, baina eguraldi kaskarrak ez zuen horretan lagundu. Hurrengo aldietarako elkarretaratzejendetsuagoak agindu zituzten.
Nolanahi ere, ekitaldia arrakastatsua izan zen oso. Emakumeak eta haurrak bildu ziren nagusiki, eta blokeoaren kontrako pankartak eta oihuak egin zituzten. Israelek Gazari ezarritako blokeoaren ondorioz, bertan bizi diren 1,5 milioi palestinarrei eragindako ondorio larriak salatu zituzten. Munduak Gaza heriotzara kondenatu du. Horixe irakur zitekeen manifestariek zeramatzaten pankarten mezuen artean. Ameriketako Estatu Batuen eta Europako Batasunaren jarrera ere salatu zuten horrela. Hamas Erresistentzia Islamikoaren Mugimenduak duela bi urte bozak irabazi ostean, palestinarrei bideratutako diru laguntzak eten zituzten Washingtonek eta Bruselak.
Gazako herritarrek oinarrizko elikagaiak lortzeko arazoak dituzte, eta egoera okerrera egiten ari da egunetik egunera. Israelek etengabeko blokeoa ezarri dio lurralde palestinarrari, 2005eko udan bertatik alde egin zuenetik. Blokeo hori ia erabatekoa da urtarrilaren 17az geroztik. Israelera ekintzaile palestinarrek botatzen dituzten koheteak da blokeoa ezarri eta justifikatzeko baliatzen duen argudioa.
Khamal al Khudari ekimena antolatu zuen erakundeko kide eta diputatuak giza katearen asmoa zein zen azaldu zuen: «Ekitaldi baketsu eta arduratsu bat da, blokeoaren eta zigor kolektiboaren aurkako jarrera ozen aldarrikatzeko aukera ematen duena». Fauzi Barhum Hamaseko bozeramaileak ekimenean parte hartzeko deia egin zien palestinarrei: «Alarma dei bat plazaratu nahi dugu lau haizeetara, munduak zerbait egin dezan egoera hau amaitzeko».Ismail al Askar Hamaseko diputatua haratago joan zen: «Blokeoa ez bada gelditzen, eskualde osoa suntsituko duen urakan bat altxatuko da».
ISTILUAK EREZKO PASAGUNEAN. Giza katearen antolatzaileek ekitaldi baketsu gisa aurkeztu zutenak, baina, errezeloak piztu zituen Israelen. Erezko pasabidean liskarrak izan ziren protestaren amaieran. Bi mila manifestari muga zeharkatzen saiatu ziren, eta segurtasun indarrek mugarako bidea trabatuta bazuten ere, palestinar gazte andana pasabidera hurbildu eta harriak soldaduei harriak botatzeari ekin zieten. Israelgo armadak tiroz erantzun zuen, eta bi haur palestinar zauritu zituzten. Horrez gain, berrogeita hamar bat manifestari atxilotu zituzten.
Gaza eta Israel arteko muga zeharkatzeko ahalegina eginez gero gogor erantzungo zuela ohartarazia zuen aurretik Israelek. Mathan Vilnai Israelgo Defentsa ministrordeak egin zuen ohartarazpena: «Beharrezkoak izango diren baliabide guztiak baliatuko ditugu palestinarrak gure lurraldera sartzea eragozteko». Israelgo armadako eledun batek zehaztu zuenez, armada «edozein gertakizuni» aurre egiteko prest zegoen. Israelgo milaka soldadu eta polizia alerta egoeran jarriak ziren atzoko gertaeren harira.
Israelgo armadak, anartean, lau ekintzaile palestinar hil zituen igande gauean. Piloturik gabeko bi airekok ekintzaile taldeen kontra misilak bota zituzten Gazan. Eraso horietan bizia galdu zuten lau palestinarretatik hiru Hamaseko adar armatu Ezzedin al Kassan Brigadetako kideak ziren, eta bestea, berriz, Herri Erresistentziarako Batzordeen adar armatuko Saladin Brigadetako kidea. Leherketa horietan ere beste bost palestinar zauritu ziren.
Israelgo armadak ekintzaile palestinarrek zulatutako lau tunel desegin zituen Gazan.
«Jendeari blokeoa eta zigor kolektiboa salatzeko aukera eman dion ekitaldi baketsu eta arduratsua izan da»
khamal al khudari
giza katearen antolatzailea
«Alarma dei bat plazaratu nahi dugu lau haizeetara, munduak zerbait egin dezan egoera hau amaitzeko»
fauzi barhum
hamaseko bozeramailea
