Genero eta sexu eraso gehiago AEBetako soldaduen aldetik

Jardunean diren AEBetako militarren artean suizidioek gora egin dute —iaz 164 izan ziren, eta 2010ean, 159—, baina erreserbako soldaduak eta Guardia Nazionaleko kideak gehituta, orotara 350etik 315era jaitsi da beren buruaz beste egin dutenen kopurua. Aldiz, nabarmen egin dute gora soldadu estatubatuarrek egindako genero eta sexu indarkeriako kasuek, Pentagonoak aitortu duenez. Sexu delituak %64 igo ziren 2006tik 2011ra; genero indarkeriako kasuak, %33; eta haurrei emandako tratu txarrak, %43. Inkestako emaitzen azalpena Peter Chiarelli jeneralak eman zuen: «Hamar urtean Iraken eta Afganistanen gerran ibili ondoren, hasieran aurreikusi gabeko arazoak sortzen dira».