Georgiako espetxeetako torturak azaldu dituzte

Jatun Kalmajelidze Georgiako Espetxe ministroak dimisioa aurkeztu du, Georgiako kartzela batean presoak torturatzen dituztela erakusten duen bideo bat zabaldu ondoren. Erabakiaren berri emanez, gutun bat bidali zion atzo goizean Kalmajelidzek Ivane Merabixviliri. «Nire erantzukizun politikoa aitortzen dut, eta nire dimisioa onartzeko eskatzen dizut».

Bideoa Georgiako bi telebista katek argitaratu zuten herenegun iluntzean. Bi urtez grabatu zituen irudiak espetxeko funtzionario batek. Bertan, presoak nola torturatzen dituzten ageri da. Irudiek hainbat protesta eragin dituzte Tbilisi hiriburuan eta beste hiri batzuetan, eta liskarrak ere izan dira. Mijail Saakaxvili Georgiako presidenteak adierazi du «oso haserre» dagoela, eta hitzeman du torturak egin dituztenak zigortuko dituela.