Irlandako Poliziak gizon bat atxilotu du Dublinen, Ingalaterran Essexen joan den astean aurkitu zuten kamioiarekin lotuta. 39 pertsona agertu ziren hilik kamioiaren atoian. Hasieran, txinatarrak zirela jakinarazi zuen Erresuma Batuko Poliziak, baina vietnamdarrak ote diren ikertzen ari da, hango apaiz batek hori esan eta gero.
Larunbatean atxilotu zuten gizona Dublingo portuan, eta gertatutakoarekin zer zerikusi duen ikertzen ari dira. Orain arte, pertsona bakarra zegoen atxilotuta: kamioiaren gidaria. Gaur deklaratuko du epailearen aurrean.
Erresuma Batuko gobernuak hainbat agiri bidali dizkio Vietnamgoari, apaiz vietnamdarrak esan duen bezala, hildakoak hangoak ote diren argitzeko. Vietnamgo Gobernuak, ordea, esan du oraingoz ez dagoela arrazoirik pentsatzeko hildakoen artean vietnamdarrak daudela.
