"Eraso terrorista" izan dela adierazi du Belgikako fiskaltzak. Hango hainbat hedabideren arabera, erasotzaileak "Ala da handiena" oihukatu du.
Gizon batek eraso egin die Liejako bi poliziari bizkarraldetik, eta ebakiak egin dizkie arma zuri batekin. Erasotzaileak pistola bat kendu dio zauritutako polizietako bati, eta tiroz hil ditu, 10:30ak aldera. Auto batean zegoen gizon bati ere tiro egin dio eta hil egin du hura ere. Institutu batean gotortu da ondoren, emakume bat bahituta. Ordu erdiz egon da gordeta institutuan, poliziei tiroka irten den arte. Bi polizia zauritu ditu, agenteek erasotzailea hil aurretik.
Liejako gobernadore Herve Jamarrek azaldu duenez, institutuan ez da zauriturik egon. "Ikasleak salbu daude, eta inor ez da zuritua izan. Erasotzailea neutralizatua izan da", adierazi du Twitter bidez.
RTBF kateak jakinarazi duenez, erasotzailea Benjamin Herman izenez identifikatu du poliziak. 36 urteko gizonezkoa Lantingo espetxeko presoa zen —Liejatik gertu dago kartzela— eta baimen bat lortu zuelako zegoen kalean. Poliziak uste du espetxean erradikalizatu dela.
Bestalde, ustezko jihadista bat atxilotu du gaur Ertzaintzak Donostian. Polizia iturrien arabera, Frantziatik ihes eginda zegoen.
