Poliziaren arrazakeriak eta biolentziak ez du etenik Estatu Batuetan; 500 lagunetik gora dira aurten poliziak hildakoak. Cincinatuko (Ohio) hogeita bost urteko poliziari, Ray Tensingi, gaitzetsi diote azken hilketa, eta gaur deklaratuko du. Gertatutakoa jasotzen duen bideoa argitara eman dute.
Autoan matrikularik gabe ibiltzeagatik gelditu zuen poliziak berrogeita hiruko gizonezkoa, uztailaren 19an. "Zentzurik gabeko heriotza da, eta ezin justifikatu daitekeena, inondik inora. Polizia ez zen ari eztabaidatzen hilketa batengatik bilatzen zuten inorekin, matrikula ez zeraman lagun batekin baizik", azaldu du Joseph Deters fiskalak.
Poliziaren bertsioa oso bestelakoa da. Eztabaidaren erdian, autoan zihoan gizonezkoak kotxearekin harrapatuko zuelakoan, bere burua salbatzearren tiro egin ziola esan du. Fiskalak, ordea, hori ez zela inondik inora gertatu berretsi du. Gaur deklaratuko du Ray Tensing poliziak eta prozesu judiziala bere aurka ebatziz gero, bizi bitarteko kartzela zigorra jasotzeko aukerak izango ditu.
