Gose greban dauden sei preso palestinar hiltzeko arriskuan daude

Gurutze Gorriak ohartarazi duenez, «berehala» hiltzeko arriskua dute epaiketarik gabeko espetxeratuen egoera salatzeko gose greban dauden sei preso palestinarrek, eta ospitale batera eramateko eskatu dio Israeli. Giza eskubideen aldeko erakunde palestinarren arabera, ia 2.000 preso palestinar daude gose greban Israelgo espetxeetan. Gehienek joan den hilaren erdialdean ekin zioten protestari.

Sei preso horiek, baina, 47 eta 71 egun artean daramatzate gose greban. Juan Pedro Schaerer Gurutze Gorriko kideak erran du elikatzeko edo mediku zaintza jasotzeko erabakia preso bakoitzarena dela, baina esan du ospitale batean egokiago kasu egin dakiokeela haien egoerari. PAN Palestinako Aginte Nazionalak, berriz, esku hartzeko eskatu dio nazioarteari. «Presoen bidezko eskakizunak onartzera behartu behar du nazioarteak Israelgo Gobernua, nazioarteko legeek bermatutako gutxienekoa baita eskatzen dutena».