Ameriketako Estatu Batuetako Geologia Zerbitzuak jakinarazi du Richter eskalan 7,5 gradukoa izan dela lurrikara. Hasiera batean, zerbitzu horrek zabaldu du 7,7 gradukoa izan dela lurrikara, baina datua zuzendu du ondoren. Epizentroa Afganistanen kokatu badute ere, Pakistan, India eta Nepalen ere nabaritu dute.
Gutxienez 131 lagun hil dira Pakistan ipar-ekialdean, lurrikararen eraginez. Ehunka dira zauritutakoak. Afganistanen, berriz, 23 dira hildakoak, eta 30 inguru zaurituak. Indian, bi pertsona hil eta beste bi zauritu dira ezbeharrean.
