Gutxienez 28 lagun hil dira, horietako 22 haurrak, Suitzan izandako autobus istripu batean. Sierre herriaren parean izan da ezbeharra; autobusak tunel baten hormaren aurka jo du. Autobuseko bi gidariak ere hil egin dira. Fiskalak esan du ibilgailua legezko abiaduran zihoala.
52 lagun zihoazen autobusean eta beste 24 haur ospitalera eraman dituzte, zaurituta —12 urte dituzte haurrek—.
Valaisko kantoiko agintariek azaldu dute haurrak Belgika iparraldekoak direla, eta Suitzako Alpeetako eski kanpamentu batean oporretan egon ondoren etxera bidean zirela. Herbehereetako hamar haur ere bazihoazen autobusean, baina ez dute jakinarazi horiek hildakoen artean dauden.
Biktimen familiak Bruselatik Genevara (Suitza) eraman dituzte hegazkinez. Senideekin batera, psikologo talde batek bidaiatu du.
Europako Parlamentuak minutu bateko isilunea egin du biktimak gogoratzeko, eta Europako Batzordeko eta Europako Kontseiluko ordezkariek babesa eskaini diete senide eta lagunei. Suitzako Gobernuak ere laguntza eskaini die.
Herman Van Rompuy Europako Kontseiluko presidenteak esan du "drama lazgarri bat" izan dela, eta Belgikako herritar guztiak "haur horien aita, ama eta anai-arreba sentitzen direla".
