Oposizioak zabaldu duenez, gutxienez 93 lagun hil dituzte gaur Homs hirian Baxar al-Assaden aldeko indarrek. Lekukoek adierazi dute, bonbardaketek jendez beteriko hainbat etxebitzitza eraitsi dituztela.
Siriako Gobernuak "talde terroristen erasoak" salatu ditu
Siriako Gobernuak "talde terroristen erasoak" salatu ditu, Homs hiriko hainbat lekutan. Sana berri agentziak azaldu duenez, eraso horietako batzuk Al Baaz unibertsitatean, Al Naimi ospitalean eta Baba Amr auzoan gertatu dira.
Agentziak dioenez, unibertsitatean kalte materialak daude, eta hiriko findegi bat eraso egin ondoren, bi tankek su hartu dute. Ospitaleko materiala harrapakatu egin dute, eta Osasun Sailak ohar bat kaleratu du ekintza hori salatuz. Gobernuaren arabera, "jendeak doako osasun zerbitzua jasotzea galarazten dute" ekintzok. Guztira 16 ospitalen aurkako erasoak salatu ditu Siriako Gobernuak.
Horrez gain, "talde terroristei" Baba Amr auzoan hainbat leherkari jartzea egozten zaie.
