Gutxienez bederatzi zibil hil ditu Israelgo Armadak eta Hezbolak koheteak jaurti ditu Haifaren aurka

Hezbolak, gaur, hamar =katyusha=i kohete jaurti ditu gutxienez Israel iparraldeko Haifa hirira. Batek autobus bat jo du eta bestea, aldiz, etxebizitza bat. Bost pertsona zauritu dira eta horietako bat oso larri dagoela jakinarazi dute erietxeetako iturriek.

Bien bitartean, Israelgo Armadako Nabatiye herria bonbardatu eta bederatzi zibil libanoar hil ditu. Nabatiyeko alkate Saad Gandurrek Al Jazeera telebista katean azaldu duenez, familia bateko zazpi kide eta beste bateko bi hil dira Israelgo jautigai batek beraien etxea jo duenean. Guztiak, zibilak direla azpimarratu eta galdetu zergatik bonbardatzen dituen Israelek Hezbolako ekintzaileen gordeleku ez diren etxeak.

Hezbolaren gotorleku nagusia kontrolpean duela dio Israelek, milizia xiitak ukatu egin du

Libanoko Bint Jebel herria kontrolpean du Israelgo Armadak. Horixe jakinarazi du gaur Israelgo irrati publikoak. Antza denez, Bint Jebel da Hezbola Libanoko milizia xiitaren gotorleku nagusietako bat. Miliziaren hiriburutzat hartua izan den herriaren barruan, Hezbolako 150 ekintzaile lubakian babestuta daudela adierazi du irratiak. Israelgo Armadak setiatuta dauzka. Hezbolak, baina, albistea zabaldu bezain pronto ukatu egin du Israelgo Armadak herriaren kontrola bereganatu duela.

Al Manar telebista katearen bidez zabaldu du oharra Hezbolak: "Bint Jebel okupazio indarren kontrolpetik kanpo dago eta oraindik borroka indartsuak izaten ari dira herriaren kanpoan".

Bien bitartean, Israelgo militarren hitzetan borrokak ez dira amaitu, hain zuzen ere, ekintzaileak herri horretako [Bint Jebel] kaleetan erasoei aurre egiten ari direlako. "Terroristak gogor jotzen ari gara eta preso hartu ditugu hainbat", adierazi du Israelgo irrati publikoan Itzik Ronen koronelak.