Iaztik agintean den Emmerson Mnangagwaren alderdiak, ZANU-PF Zimbabweko Batasun Afrikar Nazionala-Fronte Patriotikoak, 109 eserleku lortu ditu orain arte, eta Nelson Chamisak, oposizioko hautagai nagusiak, 41. Hala, botoak zenbatzen amaitu ez duten arren, Hauteskunde Batzordeak ZANU-PFri eman dio garaipena.
Batzordeak nabarmendu du asteleheneko bozak "garbiak eta iruzurrik gabeak" izan zirela. Ordea, oposizioak "emaitzak manipulatzen" ahalegindu izana leporatu dio Mnangagwaren alderdiari. Horiek hala, eurak ere botoak zenbatu dituzte, eta zenbaketa horren arabera, Chamisaren MDC Aldaketa Demokratikorako Mugimenduak irabazi ditu bozak.
Oposizioko jarraitzaileak kalera atera dira protestan Harare hiriburuaren erdigunean, eta orduak pasatu ahala tentsioa asko handitu da. ZBC telebista publikoaren arabera, hiru lagun hil dira "biolentzia politikoaren ondorioz". Aurrez, AFP berri agentziak zabaldu du armadak manifestari bat hil duela tiroz.
Presidentea, parlamentua eta udalak aukeratzeko hauteskundeak egin zituzten joan den astelehenean. Presidentetzarako hauteskundeen emaitzak argitaratzeko larunbaterako epea du Hauteskunde Batzordeak. Priscilla Chigumba batzordeko presidenteak esan du "prozesu legalak bukatu bezain azkar" argitaratuko dituztela. 23 hautagai aurkeztu ziren, baina Mnangagwaren eta Chamisaren artean egongo da lehia.
Robert Mugaberen 37 urteko agintaldia estatu kolpe batekin amaitu zen. Iazko azaroan presidenteorde karguan zen Mnangagwa kargugabetu egin zuen Mugabek, baina erabakia ez zen armadaren gustukoa izan eta dimisioa ematera behartu zuen hiru hamarkadaz estatuburu izandakoa.
