Gutxienez, Israelgo zazpi lagun hil dituzte atentatu batean Bulgarian

Gutxienez, zazpi pertsona hil eta 33 zauritu dira Israelgo turistak zihoazen autobus baten aurka egindako atentatuan, Bulgariako Burgas hirian, hango alkate Dimitar Nikolovek esan duenez. Eztanda egin duen autobusean 40 lagun zeuden, eta leherketak eragindako suak ondoko bi autobusei ere eragin die. Aireportutik hirira zihoazen bidaiariak autobusetan. Leherketa gertatu denean, agintariek aireportua itxi dute, eta hegaldi guztiak Varnas hiriko aireportura bideratu dituzte. Benjamin Netanyahu Israelgo lehen ministroak Iran egin du atentatuaren erantzule, eta esan du «ausardiaz» erantzungo diola «Irango terrorismoari».