Italiako kostazainek 500dik gora etorkin zeramatzan ontzi bat atzeman dute Libiako kostaldetik gertu. Itsasontzian, hamahiru etorkinen gorpuak ere aurkitu dituzte. Bizirik atera diren lagunak Italiako portu batera eramango dituzte kostazainek datozen orduetan.
Urtea hasi zenetik 150.000 etorkin inguru erreskatatu dituzte Mediterraneoan, gehienak Italia eta Greziako kostaldean eta 1.900 lagun baino gehiago hil dira Europara bidean.
Zifrak adina pertsona
Mediterraneoak irentsen dituen etorkinen kopuruak ez dauka etenik. Urte hasieratik hona, ia 2.000 pertsona hil dira, Europara iritsi nahian. Afrikatik Europarako bidean gertatutako ezbehar larrienetakoa gertatu zen apirilean; 700 lagun baino gehiago desagertu ziren Lampedusako kostatik 200 kilometrora izandako ezbeharrean. "Dirua egiten duten mafiei" egotzi zien gertatutakoaren ardura Matteo Renzi Italiako lehen ministroak.
