Hamas eta Al Fatak bien arteko gatazka konpontzeko proposamena sinatu dute

Palestinako Hamas erakundeak eta Al Fata alderdiak bien arteko gatazka gainditzeko aurrera pausoa eman dute gaur, bakoitzak bere aldetik Egiptok egindako bake proposamena sinatu ostean, Efe berri agentziaren arabera.

Hamaseko eta Al Fatako ordezkariak, beste zenbait alderdi palestinarretako kideekin batera, martxoan hasi ziren biltzen. Batasun nazionaleko gobernua osatzeko oinarriak ezartzea eta Presidentetzarako eta Legebiltzarrerako bozetarako deialdirako ados jartzea ziren negoziazioetako helburu nagusiak. Bost hitzorduren ostean, bozak datorren urtarrilaren 20an egitea hitzartu zuten.

Bi indar politikoen arteko gatazka 2007ko ekainean hasi zen, Gaza kontrolpean hartu zuen orduan Hamasek, aurreko urteko bozetan eremu horretan gehiengo osoa lortu ostean. Israelek setiatuta daukan guneko kontrola hartzearekin batera, Mahmud Abbasen aldeko indarrak kanporatu zituen handik; Abbas, PAN Palestinako Aginte Nazionaleko presidentea izateaz gain, Al Fatako liderra da.