Hauteskundeak aurreratzeko eskatu du Al-Sadr buruzagi xiitak, Iraken

AEBetako tropak Iraketik atera direnetik egoera nahasia dute gobernuan, eta atzo Nuri al-Maliki lehen ministroaren gobernuko Aliantza Nazionala xiitatik bertatik ohartarazi zioten egoerarekin amaitu beharraz. Muqtada al-Sadr buruzagi xiitak eskatu du Legebiltzarra bertan behera utzi eta hauteskundeak aurreratzeko. Haren ustez, egungo gobernua ez dago Irakek dituen arazoei eta erronkei aurre egiteko moduan.

Al-Sadr ez da gobernuaren eraginkortasuna kritikatu duen bakarra. Aurretik, Al-Irakiya koalizio sunitak esan du legebiltzarrean parte hartzeari utziko ziolajoan den astean, Al-Malikiren gobernuak «boterea bere neurrira» moldatu duelako, gainerako alderdiak kontuan hartu gabe.

2010eko martxoan egin zituzten hauteskundeak Iraken, eta Iyad Allawiren Al-Iraqiya koalizio sunitak lortu zuen boto gehien: 91 eserleku; Al Malikiren Aliantza Nazionala koalizio xiitak 89. Inork ez zuen bakarka agintzeko adina botorik lortu, eta zortzi hilabetez hutsik egon zen gobernua. Azkenik, hiru fakzio nagusiek — xiitek, sunitek eta kurduek — batasun nazionaleko gobernua eratzeko akordioa sinatu zuten. Al-Maliki izendatu zuten lehen ministro, eta xiiten zuzendaritzapean utzi zituzten erakunde politiko gehienak. Tarik Al-Hashimi presidenteordearen atxiloketa aginduaren berri jakin ostean, gobernuko bilerei ere boikot egitea erabaki zuen.

Joe Biden AEBetako presidenteordea ere Iraken dela jakinarazi du Al-Mada egunkariak. Jalal Talabani presidentearen gertukoa da komunikabide hori, eta esan duenez, krisia aztertzera joan da, arazoak gainezka egin ez dezan.

Al-Qaeda atzean

Bien bitartean, atentatuak ez dira gutxi izaten ari, eta joan den ostegunean, Bagdaden, ia batera hamabi lekutan zartarazi zituzten bonben ezarpena Irakeko Al-Qaedak aldarrikatu du. 69 lagun hil, eta 191 zauritu ziren. Taldearen arabera «Gerra Ministerioak» antolatu zuen ekintza. Internet bidez egin du jakinarazpena, baina ez dute oraindik baieztatu.