Silvio Berlusconi Italiako lehen ministroak esandakoa betetzen badu ez da agintera itzuliko. Atzo Italiako presidentearen aurrean dimisioa emateko konpromisoa hartu zuen, Euroguneak agindutako murrizketak ezarritakoan. Gaur gaineratu du otsailerako deituko dituzten hauteskundeetan ez duela bere burua aurkeztuko.
Atzo Italiako Parlamentuan zuen gehiengoa galdu zuen Berlusconik. 308 legebiltzarkidek bozkatu zuten bere alde, eta 321ek, kontra. Otsaileko hauteskundeetan PDL alderdiaren hautagaia Angelino Alfaro izango dela adierazi dio La Stampa egunkariari.
Dimisioa eman aurretik, ordea, 2012ko aurrekontuen legea onartuko du Berlusconik. Lege horretan Italiak ere zorra murrizteko eta ekonomiaren garapena bultzatzeko Europarekin adostutako neurriak jaso ditu. Beste alderdiak neurri horiek babestera deitu ditu.
Bere etorkizunaz ezer ez du esan, baina lehen ministro izateari utzita, epaitegietan bere aurka dauden salaketei erantzun beharko die, immunitatea galdu ostean. "Agian Milanez [futbol taldeaz] arduratuko naiz berriro".
