Selahattin Demirtas eta Figen Yuksekdag HDPko buruak eta bederatzi diputatu atxilotu ditu Turkiak gaur gauean. Barne Ministerioak ohar batean azaldu duenez, auzitegiek deklaratzera deitu dituztenean ez direlako joan atxilotu dituzte. Fiskal batek baino gehiagok egin ei dute eskaera, haiek irekita baitituzte HDPko kideen kontrako auziak, PKKrekin lotura izatea egotzita. Atxilotu batzuk espetxearen alde dago Fiskaltza.
138 legebiltzarkideri inmunitatea kentzea erabaki zuen parlamenduak maiatzean —gehienak oposizioko sozialdemokratak eta kurduak—, eta horren ondoren datoz atxiloketok. HDPk orduan ere salatu zuen beraien kontra egiteko neurria zela immunitatea kentzearena, haietako askoren kontrako auzibideak abiatuta baitzeuden ordurako. Legebiltzarrean hirugarren indarra da HDP.
Diyarbakirren atxilotu dute Demirtas eta Ankaran Yuksekdag. Aurrenak bere Twitter kontuan berri eman du polizia zuela etxe aurrean eta atxilotu egingo zutela. Diputatuak lurralde osoan atxilotu dituzte, aldi berean egindako operazioan, eta HDPren egoitza nagusia ere arakatu dute. Faysal Sariyildiz eta Tugba Hezer Öztürk diputatuak atxilotzen ere saiatu dira, baina, atzerrian daudenez, ezin izan dituzte topatu.
"Garbiketa operazioa" izan dela salatu du HDPk.
