Aditu independenteek informazioa berresteko asteak beharko diren arren, nazioarteak ontzat eman du oraingoz Ipar Korearen iragarpena, alegia, lehen aldiz hidrogeno bonba bat probatu duela. Oraingoz leherketaren froga bakarrra litzateke, eztandak bost graduko lurrikara eragin duela herrialdearen ipar-ekialdean.
Lehen aldia da Kim Jong-unen erregimenak halako bonba batekin probak egiten dituela. Hidrogeno bonba ohiko bonba nuklearrak baino askoz ere indartsuagoa da, horiek hala, eta erregimenak halako lehergailu bat egiteko ahalmena duela frogatuz gero, nabarmen okertuko lirateke haren eta nazioartearen arteko harremanak.
Hain zuzen ere, Piongiangen aurkako neurriak hartzeko eskatu dio Japoniak NBEren Segurtasun Kontseiluari, ohartaraziz erregimena "arriskutsu" bilakatu dela herrialdearentzat. Txinak ere, Ipar Korearen aliatu bakarretakoak, gaitzetsi egin du proba nuklearra. Hego Koreak, berriz, larrialdiko bilerak deitu ditu gertatutakoa argitu asmoz. NBEko idazkari nagusi Ban Ki-moonek berak ere kritikatu egin du proba, eta nabarmendu "kolokan" jartzen duela inguruko herrialdeen segurtasuna. Hala Banek eskatu dio Ipar Koreari behin betiko amaitzeko arma nuklearrak garatzeko ekintza oro.
Ez da lehen aldia nazioarteak Ipar Korearen aurkako neurriak hartzen dituela, halako proben ostean. 2006an, 2009an eta 2013an esaterako, hainbat bonba nuklear zartarazi ostean, mugatu egin zizkioten nazioartearekiko merkataritza harremanak, herrialdea bakartuta utziz.
AEBek Hiroshima eta Nagasaki hirietan jaurtitakoak baino mila aldiz indartsuagoa litzateke hidrogeno bonba.
