Atzo bildu ziren, Kairon, Al-Fatah eta Hamaseko ordezkariak, eta, "elkarrizketa emankor baten ondorio", palestinarren bi indar politiko nagusiek uztail alderako batasun gobernua eratzea hitzartu dutela jakinarazi du Hamaseko kide Moussa Abu Marzouqek. Egiptoren bitartekaritzarekin, 2011ko maiatzean sinatu zuten Al-Fatahek eta Hamasek adiskidetze akordio bat, batasun gobernu bat osatu eta hauteskundeak egiteko. Bi urtean ez dute asmo hori gauzatzea lortu, baina atzo beste urrats bat egin zuten bide horretan.
Hamasek 2006an Gazako hauteskundeak irabazi ondoren, Yasser Arafat hil osteko liskarrak gogortu egin ziren bi mugimendu palestinarren artean. Armatan altxatu ziren elkarren kontra, eta, geroztik, Al-Fatahek Zisjordania kudeatzen du, eta Hamasen Gazako zerrenda.
Gaur, hain zuzen, Nakba eguna oroituko dute palestinarrek, Hondamendiaren eguna. Israelek 1948an estatu propioa sortu eta 700.000 palestinarrek beren bizilekuetatik alde egin behar izan zuten duela 65 urte. Orduz gero, israeldarrek ospakizun eguna dute maiatzaren 14a, estatu sionistaren sorreragatik, eta maiatzaren 15a dolu eta protesta eguna da palestinarrentzat.
