Ehun eta hogeitamar gorpu lurperatu dituzte gaur Srebrenican, 1995eko uztailan hil zituzten gizonezko bosniarrenak guztiak. Hogei urteotan identifikatu dituzten gorpuzkinetako batzuk dira; ia mila lagunen gorpuzkinak daude oraindik identifikatzeko. Sarraskian hildako 6.200 biktimen gorpuak daude oraingoz hilobiratuta.
Ratko Mladic jeneralak zuzendutako sarraskian 8.000 gizonezko bosniar inguru hil zituzten Srebrenican. Hain justu, gizonezko horiek eraman zituzten lantegiaren aurrean ehortzi dituzte gorpuzkinak gaur goizean. Ekitaldian izan dira, besteak beste, Serbiako lehen ministro Aleksandar Vucic eta AEBetako presidente ohi Bill Clinton.
Vucic harrika hartu dute Srebrenicako sarraskian hildakoen senitartekoek, eta joan egin da hilerritik.
Epaiaren zain
Genozidioa leporatuta, 20 agintari politiko eta militar epaitu dituzte dagoeneko Hagako Auzitegian. Hamalauri ezarri diete zigorra; Radovan Karadzic eta Ratko Mladic epaiaren zain daude. Mladic Bosniako serbiarren buru izan zen Balkaneetako Gerran.
