Genevako bake negoziazioetan Siriako Gobernuak eta NCSROF oposizioko koalizioak lortutako hurbilketa bakarra Homsen gerrak harrapatutako zibilak ateratzeko aukerari buruz izan zen, baina akordiorik ez zuten itxi. Geneva-2 konferentziaren bigarren elkarrizketa txanda gainean dutela —astelehenean elkartuko dira berriro bi aldeak—, Sirian bertan egin dute Homsetik haurrak, emakumeak eta adinekoak ateratzeko hitzarmena.
Goizean jada 200 bat zibil atera dituzte Homseko Hiri Zaharretik NBEren ibilgailuek babestutako hiru autobus eta sei anbulantziatan. Matxinoen kontrolpeko eremu batean sartu dira giza laguntza taldeak, eta hurrengo egunetan setiatutako herrian harrapatuta dauden 3.000 lagun inguru ateratzea espero da.
Errusiako Gobernuak jakinarazi duenez, Baxar Al-Assaden gobernuak eta oposizioko indarrek hiru eguneko su-eten bat eman dute Homsetik zibilak ateratzeko.
