Errege Etxeak iragarri duenez, gobernuburua aukeratzeko epea amaitu aurretik hautagairen bat inbestidura saiora aurkeztea da helburua. Ordurako inork ez badu nahikoa babes lortzen, berriro izango lirateke Espainiako Gorteetarako hauteskundeak. Irailean, Mariano Rajoy PPko presidentegaia aurkeztu zen inbestidura saiora, baina ez zuen gobernatzeko adina babes eskuratu.
Azken egunetan PSOEren zuzendaritzan izandako aldaketek, ordea, aldatu egin dute jokalekua. Pedro Sanchez PSOEko idazkari nagusi ohiak behin eta berriz esana zuen ez zuela Rajoy edo PP babestuko, baina, hark dimisioa emanda, inbestidura saioan abstentzioaren botoa emateko aukera handitu egin da, alderdiko hainbat buruzagik adierazi dutenez.
