Askapena, Ekologistak Martxan, Kakitzat, KEM, Komite Internazionalistak eta Sare Antifaxistak elkarteek mendebaldeko indarrek Libian egindako eraso militarra gaitzetsi dute, Bilbon egindako agerraldi batean. Lurrean hildako hainbat pertsona irudikatzen zituzten bitartean, “interes ekonomikoen kontrolari eustea helburu duen esku sartzea” salatu dute.
Europako Batasunak AEBen eta Nazio Batuen oniritzi “hipokritarekin” hasitako gerraren ondorioak "beti bezala" herritarrek pairatuko dituztela adierazi dute elkarte haiek. Hala, aurretik emandako erasoak gogora ekarri dituzte; Afganistangoa eta Irakekoa, kasu.
Espainiako Estatuak Libiari 2010eko lehen seihilekoan 6,8 milioi eurotan baloratutako material militarra esportatu ziola esan dute.
Manifestazioa egingo dute larunbatean, Bilbon (18:00, Arriaga plaza).
