PKK Kurdistango Langileen Alderdiak Turkiarekiko gatazka konpontzeko urratsa egin zuen, gerrillari guztiak mugaz beste aldera Iraken menpeko Kurdistanera erretiratuko zituela iragarri zuenean. Maiatzaren 8an hasi zuten prozesua, eta gaur iritsi dira lehen gerrillariak Turkiako mugaz beste aldera. Irakeko Gobernuak, ordea, ez du ontzat jotzen gerrillariak bere mugen barrura sartzea, "independentziaren ageriko urraketa delako eta Ankararen eta Bagdaden arteko auzo harremanarentzat kaltegarria delako".
Irakeko Atzerri Ministerioak kexu bera egingo du Arabiar Ligan, "bere subiranotasunaren alde Irak babes dezatela" eskatzeko. Inguruko herriek dituzten arazoak konpontzeko ahaleginak babesten ditu Bagdadek, "baina ez Iraken kontura egiten direnean".
