Iranek ez du onartu programa nuklearraren inguruan EBk egindako proposamena

Hitzarmen horretan esaten zen, Teheranek erabilera militarrerako ikerketa nuklearrak bertan behera utziko zituela baldin eta EBk nazioarteko komunitatearekin harremanak hobetzen, eta segurtasun zein ekonomia arloan lagunduko balu.

Aste honetan, ordea, armagintzarako balio dezaketen ikerketa nuklearrei ekingo ziela iragarri du berriro Teheranek, segurtasuna mehatxatuta ikusten zuela eta. Iragarpen horren ildotik iritsi zen EBren proposamen berria, baina Irango Gobernuaren iduriko han jasotzen dena eskasegia da onartzeko.

Mahmud Ahmadinajed Irango presidente berria suntsipen handiko arma guztiak —nuklearrak barne— desagerraraztearen alde agertu da aste honetan, baina munduko herrialde guztiei segurtasun aukera berak bermatzen bazaizkie. Ahmadinajeden arabera, potentzia handiak armagintzari buruz duten jarrera bidegabea da, euren nahierara galarazten zaielako herrialde batzuei arma nuklearrak garatzea, eta beste batzuei baimentzen.

Ahmadinajedek gaur egin du karguaren zina Parlamentuan, eta hitzaldi horretan esan du nazioarteko legedia onartzen dutela, baina ez direla "atzerritarren aurrean makurtuko". "Ez dugu onartuko gure herrialdearen eskubideak bortxatzea. Gure politikaren printzipio utziezina da. Inoiz ez dugu gure duintasuna sakrifikatuko", adierazi du.Ahmadinajeden hitz horien ondoren etorri da Atzerri ministroaren iragarpena: hau da, ez dutela EBren proposamena onartzen.

EBk, berriz, Teherani ohartarazi dio proposamen hori ez onartzekotan NBE Nazio Batuen Erakundearen Segurtasun Kontseilura eramango dutela gaia, eta nazioarteko gatazka handia sor daitekeela.