Iranek jarduera nuklearrak berrartu ditu Isfahaneko instalazioetan

IRNA berri agentziaren arabera, Iranek gaur berrartu ditu jarduera nuklearrak Isfahaneko instalazioetan, Iran erdialdean. Agentziak adierazi duenez, fabrika "uraniozko hauts kontzentratua" ekoizten hasi da zaintza eta segurtasun kameren instalakuntza egin ostean. Oraindik ez dira hasi uranioa HF6 uraniozko hexafloruro gasean bilakatzen.

Iraneko Energia Atomikoaren Erakundeko buruzagiorde Mohamad Saeedik adierazi duenez, "Isfahaneko uranioaren aldaketarako instalazioak Nazioarteko Energia Atomikoaren Erakundearen gainbegiradapean hasi dira lanean".

Mohamed Zaidad Iraneko negoziaketa taldeko kideak ohartarazi du Isfahanen gauzatuko diren beste jarduera nuklear guztiak bihar berrartuko direla.

Europar Batasuna

Europar Batasunak proposamen berri bat luzatu zion Irani nazioartean mantentzen ari den auzi nuklearrari irteera bat emateko asmoz, eta ohartarazi die Isfahaneko zentralarekin aurrera jarraitzen badute elkarrizketak etengo dituztela.

Frantziako Kanpo Arazoetako ministro Philippe Douste-Blazyk adierazi zuenez, Iranek hartutako erabakiak "nazioarteko krisi garrantzitsu bat sor dezake".

Iranek, aldiz, jakinarazi du bigarren pausoa ez duela aurrera eramango; hau da, HF6a ez duela zentrifugagailuetan sartuko uranio aberastua lortzeko. Uranio aberastua armamentu nuklearretan erregai gisa erabil daiteke.