Hiru hilabeterako bide orri bat hitzartu dute Irango Gobernuak eta IAEA Energia Atomikoaren Nazioarteko Agentziak, errepublika islamiarraren programa nuklearra gainbegiratzeko. Arakeko ur astunen erreaktorea eta Gatxingo uranio meategia bisitatzeko aukera izango dute IAEAko teknikariek. Gaur sinatutako hitzarmenari esker, bi aldeen artean konfiantza sustatu eta etorkizunean lankidetza "epez epeko ikuspegiarekin" egin ahal izango dutela esan du Ali Akbar Salehi Irango Energia Atomikoaren Erakundeko zuzendariak.
Iranek 5+1 Taldearekin —AEB, Errusia, Txina, Erresuma Batua, Frantzia eta Alemania— izan dituen negoziazioen aldi berean egin dira IAEArekiko elkarrizketak. Nazioarteak ez du lortu Iranekin asteburuan akordio bat ixtea, baina hurbil daudela esan dute, eta azaroaren 20an berriro Genevan biltzekotan geratu dira.
