Gauerdia pasa berria zela jaurti du Ipar Koreak irismen luzeko suziria, eta satelite bat espazioratu du. Hori jakinarazi du, bederen Piongiangeko eregimenak. Hark egindako iragarpena berretsi dute Hego Koreak eta AEBek.
Albisteak, beste behin, nazioartearen haserrea eragin du, eta larrialdiko bilera eskatu diote estatuek NBEko Segurtasun Kontseiluari. Washingtonek eta Seulek, bestalde, ohartarazi dute satelite bat espazioratzea ez, baizik misilak probatzea izan duela helburu jaurtiketak. Izan ere, Ipar Koreak aldarrikatu du berak ere baduela eskubidea "helburu baketsuekin" sateliteak espazioratzeko.
Ez da, dena den, Piongiangeko erregimenak halako ekintza bat iragartzen duen lehen aldia. 2012an Kwangmyongsong-3 izeneko satelitea espazioratu zuen, hiru saioren ostean, Orduan ere ekintzak kritika eta gaitzespen ugari eragin zituen.
Misilen aurkako ezkutua
Jaurtiketaren berri izan eta ordu gutxira iragarri du Seulek misilen aurkako ezkutua jartzeko lanetan hasiko direla, AEBekin elkarlanean. Proiektua berria ez den arren, eztabaida ugari eragin du, batez ere kostu ekonomiko handiagatik.
