"Terroristen familiek hiletak terrorismoaren aldeko manifestazio bilakatzen dituzte. Ezin dugu hori onartu", adierazi du Guilas Erdan Israelgo Barne Segurtasun ministroak. Gobernuak berak lurperatuko ditu hildako palestinarrak Israelen. Horretarako, militarren hilerri zaharrak erabiliko dituzte.
Horrekin batera, Israelgo Gobernuak baimena eman dio Poliziari Jerusalemgo auzo palestinarrak inguratzeko, eta egoitza eskubideak ukatzeko "terrorismoz" akusatutako palestinarrei. Eta erasoak egiten dituzten palestinarren etxeak botatzeko lanak indartzeko agindua eman dute.
Israelgo gai militarreko hainbat adituk zalantzan jarri dute auzo palestinarren itxierak izan dezakeen arrakasta. "Erasoak egin nahi dituztenek, beti aurkituko baitute pasatzeko modu bat". Human Rigths Watch gobernuz kanpoko erakundeak berriz, ziurtatu du neurri horrek "jazarpena eta gehiegikeria baino ez duela eragingo". Segurtasun batzordeak polizia gehiago jarriko ditu garraio publikoetan eta militarrak bidaliko ditu gune zehatzerata.
