Mohamed Jihad Dudin 13 urteko gazteari bularrean egin diote tiro, Efe berri agentziak zabaldu duenez. Duran izan da erasoa, eta Hebrongo erietxera eraman dute, baina bertan hil da.
Hainbat lekukoren arabera, gazte batzuk harrika hasi zaizkienean oldartu zaizkie militarrak. Armada etxe batera sartzear zela hasi dira gazteak militarrei harriak jaurtitzen, eta tiroka erantzun dute Israelgo soldaduek.
Betleemen, berriz, lau palestinar zauritu dira, tartean ume bat, Israelgo armadaren operazio baten ondorioz. Lekuko ugarik azaldu dute 150 soldadu inguru hainbat etxetara sartu direla, horiek miatzeko. Israelgo Gobernuaren esanetan, miaketa horiek bahitutako hiru gazte israeldarrak bilatzeko lanen parte dira.
Hilaren 12an desagertu ziren hiru gazteak, eta 300 lagunetik gora atzeman ditu harrezkero Israelek; gutxienez 25, bart gauean. Hamasi egotzi dio Israelgo Gobernuak desagerpenen ardura, eta erakunde horretakoak dira atxilotu gehienak.
