Israelgo Poliziak batere armarik ez zuen gazte palestinar bat hil du gaur goizean Jerusalemgo Hiri Zaharrean. Palestinako Telebistak azaldu duenez, 30 urteko gazteak ez die jaramonik egin poliziei gelditzeko agindu diotenean, eta horregatik egin diote tiro. Gaineratu dute arreta berezia behar zuela gazte horrek.
Israelgo Armadak baieztatu egin du hilketa, eta esan du poliziek uste zutela eskuan arma bat zuela gazteak. Poliziak ikerketa bat hasi du, eta hildakoaren senideak galdekatu ditu.
Ordu batzuk lehenago, Zisjordanian beste palestinar bat hil du Israelek. Armadak dio ibilgailu batekin hainbat soldadu harrapatzen saiatu zela palestinar hori, eta horren ondoren egin ziotela tiro. Militarren artean ez dago zauriturik.
