"Herritar baketsuen hilketa masiboagatik zigor prozesua ireki da. Janukovitx eta beste zenbait agintari ohi bilatzeko eta atxilotzeko agindua dago", esan du Facebooken Asden Avakov Ukrainako Barne ministroak. Janukovitxen Barne ministroa larunbatean kendu zuten kargutik, eta berria aukeratu zuten; Timoxenkoren alderdiko kide da Avakov.
Larunbataz geroztik desagertuta dago Ukrainako presidente ohia, parlamentuak "giza eskubideak masiboki urratzeagatik" kargutik kendu zuenetik. Zenbait hedabideren arabera, Errusiako muga zeharkatzen saiatu ondoren, Donetsk eskualdeko lekuren batean daude ezkutatuta Janukovitx eta goi kargudun ohi horiek. Orain, ordea, Krimean egon daitekeela zabaldu dute.
Atxilotze aginduan aipatzen dituzten "hilketa masiboak" azken hilabeteetan kalean Ukrainako segurtasun indarrek hil dituzten herritarrak lirateke. Maiatzaren 25ean bozetara deitu dute Ukrainan. Julia Timoxenko oposizioko buru eta lehen ministro ohia larunbatean aske geratu zen.
