Japoniako Gobernuak Oi zentral nuklearreko bi erreaktoreak martxan jartzea erabaki du gaur, eta horrela, lehenengoz egingo du halakorik 2011ko martxoan Fukushimako hondamena izan zenetik.
Japoniako lehen ministro Yoshihiko Nodak Fukui probintziako gobernatzailearekin bildu ondoren hartu du erabakia, hark horretarako oniritzia emanda —zentral nuklearra eskualde horretan dago—.
"Bertako agintarien babesa izanda, 3 eta 4 erreaktoreak piztea da gobernuaren azken erabakia", azaldu du Nodak, TBS telebista kateak jaso duenez.
Nodak beharrezkotzat jotzen du horiek piztea, "Japoniarren segurtasuna bermatzeko".
