Epilepsia eta nahasmen bipolar kasuetan agintzen zieten pazienteei Depakine izeneko sendagaia. Sendagaiaren substantzia aktiboetako batek fetuaren malformazioa edo haurraren garapen desegokia eragin ditzake, haurdunaldi garaian hartuz gero. Osasun agintarien arabera, 14.322 emakume haurduni agindu zieten botika, 2007. eta 2014. urteen bitartean. Sendagaia, ordea, 1967an merkaturatu zuten, eta ezinezkoa da tarte horretan zenbatek hartu duten zehaztea.
1980ko hamarkadatik zuen arriskuen berri botika ekoizten zuen laborategiak, Frantziako Le Canard Enchaine aldizkariak hilabete hasieran argitaratu zuenaren arabera. Aldizkariak salatu zuenez, sendagaiaren argibideen eskuorrian ohar labur bat besterik ez zuten idatzi: "Haurdun egonez gero, medikuari jakinarazi ahalbait arinen".
Marisol Touraine Frantziako Osasun ministroak jakinarazi du legebiltzarrak aztertu egingo duela emakumeei kalte-ordainak ematea. Azaldu du Gizarte Segurantzak bere gain hartuko dituela biktima izendatuen tratamenduak eragindako gastuak.
