Eztabaida politikoa ezin dela mugatu argudiatuta, Kataluniako Auzitegi Nagusiaren erabakiaren aurkako helegitea aurkeztu zuen Carme Forcadell Kataluniako Parlamentuko presidenteak urrian. Alabaina, Gorenak ez ditu haren arrazoiak onartu, eta Auzitegi Nagusia babestu du. Goreneko epaileak "apetazkoa" iritzi dio Forcadellen jokabideari, entzungor egin diolako Espainiako Konstituzionalari, "zuzenbide estatuko oinarrizko zutabe bat den epaitegiari".
Fiskaltzak egozten dio Espainiako Auzitegi Konstituzionalari desobedientzia egitea, baita prebarikazioa egitea ere. Baina Forcadellek defendatzen du ondo egin zuela Kataluniako Legebiltzarrean independetziarako bide orria eztabaidatu eta bozkatzea ahalbidetu zuenean. "Lehen aldiz, aurrekaririk ez duen ekintza batekin, auzitegietara eramango dute ideiei buruzko eztabaida bat. Ordea, ez dago legerik eztabaida debekatzen duenik". Horiek hala, ideiak defendatzen jarraituko duela iragarri du Forcadellek.
