Generalitateko jauregian egin du Quim Torrak presidente karguaren zina. Han izan dira Roger Torrent parlamentuko presidentea eta gobernuburuaren senideak; ez, aldiz, Espainiako Gobernua. Madrilek komunikatu baten bidez jakinarazi du ez dela joango ekitaldira, "gobernu ordezkaritza baten maila" eman nahi izan dietelako. "Generalitateak antolatutako ekitaldiak instituzioaren duintasuna degradatzen du", salatu du Madrilek.
Torrak kargua hartzeko erabili duen formula Carles Puigdemontek erabilitako bera izan da: "Zin egiten duzu zintzotasunez beteko dituzula Generalitateko presidente karguaren betebeharrak parlamentuan ordezkatuta dagoen Kataluniako herriarekiko leialtasunez?". Motza eta soila izan da kargu hartzea. Hala izango zela iragarria zuen Torrak berak, azken hilabeteetako gertakariak direla medio.
Karguaren zina egiteko formulak zeresana eman du, ez baititu aipatu ez Espainiako Konstituzioa eta ezta errege etxea ere. Hala, Espainiako Alderdi Sozialistako buru Pedro Sanchezek iragarri du lege aldaketa proposatuko duela halako ekitaldietan derrigorrezkoa izan dadin Konstituzioaren zina egitea. Azaldu duenez, hori egin daiteke bai hauteskunde legea aldatuz eta baita horretarako bereziki arau bat sortuz ere.
"155.ari eutsi behar zaio"
Espainaiko gobernuburu Mariano Rajoyrekin bildu da goizean Albert Rivera Ciudadanoseko burua, eta berretsi dio eutsi egin behar zaiola 155.ari. Riveraren ustez, Generalitatearen kontuak "zaindu behar dira", baina baita komunikabideak eta mossoak ere.
Ciudadanoseko buruak proposatu dio Rajoyri parlamentuko osoko bilkuretara jaoten ez diren diputatuei soldata ordaintzeari uztea. Egitasmoaren helburua litzateke erbestean dauden buruzagiei soldata ordaintzeari uztea. Bide batez, horrek esan nahiko luke Toni Cominek kontseilari kargua onartuko balu ez lukeela soldatarik jasoko, erbestean jarraituko lukeelako.
