Egiazkoa da Estatu Islamikoko miliziano bat James Wright Foley kazetari estatubatuarra hiltzen ageri den bideoa. Hala berretsi zuten atzo AEBetako segurtasun indarrek. Irudiek Washingtonen haserrea eragin dute. Barack Obama presidenteak ohartarazi du bere esku dagoen guztia egingo dutela "justizia" lor dadin. Estatu Islamikoa "erauzi beharreko minbizi bat" dela adierazi du, eta iragarri du ez dituztela etengo Iraken hasitako "bonbardaketa selektiboak".
Duela bi urte bahitu zuten Foley, Sirian. Estatu Islamikoak aste honetan zabaldu du haren heriotzaren bideoa, eta ohartarazi du beste hainbeste egingo dutela beste kazetari batekin, Steven Sotloffekin, baldin eta AEBek bonbardaketak eteten ez badituzte. Ohar bat ere egin diote Washingtoni: "Estatubatuar honen bizia, Obama, zure hurrengo erabakiaren menpe dago".
AEBetako armadak operazio berezia egin zuen uda hasieran Estatu Islamikoak bere esku zituen bahitu estatubatuarrak askatzeko, baina porrot egin zuen. "Lurrez eta airez egin zen bilaketa, Estatu Islamikoaren menpeko eremu batean. Baina ez genuen arrakastarik izan, bahituak ez baitzeuden informazio zerbitzuek uste zuten tokian", azaldu du Pentagonoko eledun John Kirbyk.
