Jai eta garaipen giroan abiatu da Denverren AEBetako Alderdi Demokrataren konbentzioa, azaroko presidentetzarako hautagaia izendatzeko batzarra; hau da, Hillary Clintonekin lehia luzean aritu ondoren primarioak irabazi zituen Barack Obama ofizialki presidentegai hautatzeko bilkura.
Obamaren emazte Michelle Robinsonek, eta, oro har, familia guztiak protagonismo handia izan zuten atzo (bart goizaldea Euskal Herrian) batzarreko lehen egunean. Obamaren "alderdi humanoa" erakutsi nahi izan dute, etxean eta senideekin dituen jarrera eta balioen berri eman.
Halaber, hauteskunde primarioetan aurkari nagusi izan zuen HIllary Clinton New Yorkeko senadorearen babesa jaso du Obamak. Clintonek bihar egingo du hitzaldia, baina bart prentsari egindako adierazpenetan aurreratu du Obamaren aldeko botoa eskatuko duela, nahiz eta onartu duen bere jarraitzaileen setkore batek ez duela begi onez ikusten hautu hori.
Baina benetako ezustekoa, konbentzioko milaka jarraitzaileak bero-bero jarri dituena, Edward Kennedy senadore beteranoaren parte hartzea izan da. Garunean tumor bat duela-eta ebakuntza larri batetik osatzen ari da Kennedy, baina batzarrean parte hartu nahi izan du Obamaren aldeko hitzaldi sutsua egiteko. "AEBak aldatzeko zuekin bat egitera etorri naiz, etorkizuna berreskuratu, gure ideal onenen bidean jarri eta Obama aukeratzera", esan du haren hitzak txalo zaparrada handi batez hartzen zituzten bitartean. Kennedytarren ageriko babesak mesede egingo dio Obamaren hautagaitzari.
AEB-etako hauteskunde prozesua
Kennedytarren babesa jaso du Obamak Denverko konbentzioan
Garunetik tumor bat kentzeko ebakuntza egin berri dioten Edward Kennedy senadoreak parte hartu du ezustean, eta Obamaren aldeko hitzaldi beroa egin du. Hillary Clintonek ere haren aldeko botoa eskatuko duela iragarri du.
Iruzkinak
Ez dago iruzkinik
Ordenatu
