Israelgo armadako bozeramaile batek aitortu duenez, Israelgo armada kolonoei armak eman eta horiek erabili ditzaten entrenatzen hasi da. Irailean Nazio Batuen Erakundeak Palestinako estatua onartdezake, eta Gazan eta Zisjordanian istiluak izan daitezkeela aitzaki hartuta ari da armada.
Gainera, Zisjordaniako kolonietan soldaduek palestinarrei nondik tiro egin ahal izango dieten ere aztertzen hasi da, horiek kolonietako segurtasun mugak gainditu ditzatekeelakoan.
"Israelgo armada kokalekuetako liderrekin eta segurtasun arduradunekin ari da hizketan. Defentsarako agenteak entrenatzeko baliabide asko ari dira inbertitzen, edozein aukerarako prestatu daitezen", esan du bozeramaileak. Shiloh-ko eta Lachish-ko militarren instalakuntzetara eraman dituzte kolonoak entrenatzeko.
'Udako haziak' operazioa
Udako haziak jarri dio Israelgo armadak operazioari, eta Haaretz egunkariaren arabera, NBEn Palestina onartzeak "istilu masiboak" eragin ditzakeelakoan dago armada. Istilu horien artean kolonietarako martxak leudekeela dio, baita "tiroketak eta eraso terroristak ere".
Armadak dio berez nahikoa izango direla soldaduak ustezko eraso horiei aurre egiteko, baina kolonia bakoitzari palestinarrak "sakabanatzeko" baliabideak emango dizkiotela gaineratu du.
Palestinarrek kolonietako lehen segurtasun lerroa gainditzen badute, negarra eragiteko gasak botako dizkietela diote; bigarrena gaindituz gero, "hanketara" egingo diete tiro.
