Marokoko Barne Ministerioak gaur jakinarazi duenez, marokoarrek babes osoa eman diote atzo erreferendumean bozkatu zuten Konstituzioari. Mohamed VI.a erregeak lortu du bere neurrira moldatutako itunari modu horretan zilegitasuna ematea, nahiz eta oposizioak erreforma "hutsalak" direla salatu duen.
Ia boto guztiak daude zenbatuta (%94), eta soilik atzerrian bizi diren marokoarrenak zenbatzea falta da. Taieb Txerkaui Barne ministroak jakinarazi duenez, parte hartzea %72,65ekoa izan zen. Azken emaitzak uztailaren 8an emango dituzte.
