Bjarni Benediktsson lehen ministroaren alderdiak irabazi ditu hamar hilabeteko tartean bigarrenez egin dituzten Legebiltzarrerako bozak. Hala ondoriozta daiteke lehen emaitzen arabera. Ordea, kontserbadoreek ez dute agintaldi erraza izango, aliantzak osatu beharko baitituzte agintea eskuratu ahal izateko.
Orotara, zortzi izan daitezke legebiltzarrean ordezkaritza izango duten alderdiak. Horien artean dago orain arte koalizio gobernuko kide izan den Alderdi Erreformista, zeinak lau puntu galdu dituen aureko bozekin alderatuta. Galera handiagoa izan du kontserbadoreen beste kideak, Etorkizun Bikaina alderdi xenofoboak, eta ondorioz litekeena da parlamentutik kanpo geratzea.
Eskuina ez ezik, ezkerreko taldeak ere hitz egiteko prest agertu dira. Ezker Berdea Mugimenduko buru Katrin Jakobsdottirrek iragarri du elkarrizketak hasiko dituztela gainontzeko taldeekin. Negoziazio horietan pisu handia izan dezake Alderdi Sozialdemokratak zeinak aurreko bozetako emaitzak bikoiztu egin dituen, botoen %12,7 eskuratuta.
